पुस ७ भरतपुर ।
लायन्स क्लब अन्तर्राष्ट्रिय डिष्ट्रिक्ट ३२५ आरले अन्तर्राष्ट्रिय अवार्ड प्राप्त गरेको छ । आइतबार भरतपुरमा पत्रकार सम्मेलन गरेर यही डिसेम्बर १५ देखि १९ सम्म भारतको अहमदाबादमा सम्पन्न लायन्स अन्तर्राष्ट्रियको इसामे फोरममा उत्कृष्ट उपलब्धि हासिल गरेको जानकारी गराइएको हो ।
क्लबका डिष्ट्रिक्ट गभर्नर नवराज सापकोटाका अनुसार उक्त फोरममा क्लबले मेम्बरसिप रिक्रुइटमेन्ट टार्गेट एचिभमेन्ट अवार्ड, एलसिआइसी टार्गेट एचिभमेन्ट अवार्ड तथा जिएटी रिजनल अवार्ड प्राप्त गरी अन्तर्राष्ट्रिय मञ्चहरुमा ह्याट्रिक गर्ने पहिलो क्लब बनेको थियो । उनका अनुसार अन्तर्राष्ट्रिय मञ्चहरुमा सहभागी सबै डिष्ट्रिक्टमध्ये ह्याट्रिक गर्ने पहिलो डिष्ट्रिक्ट बनेर सर्वोत्कृष्ट पहिचान दिलाउन सफल भएको छ ।
क्लबको छमहिने उपलब्धि
क्लबले छ महिनामा उल्लेख्य काम गरेको पनि दाबी गरेको छ । स्वास्थ्य, शिक्षा, विपद् तथा वातावरण संरक्षणसँगै र सङ्गठन विस्तारमा ऐतिहासिक उपलब्धि हासिल गरेको क्लबले दाबी गरेको छ ।
क्लबका डिष्ट्रिक्ट गभर्नर सापकोटाले बाढीपीडितको उद्धार र राहत वितरणदेखि क्यान्सर उपचारका लागि आवास तथा स्मार्ट क्यान्टिन निर्माण गरिनुका साथै भरतपुरमा आँखा अस्पतालमा भवन, मानवसेवा आश्रममा पाकशाला भवन निर्माण गरेर समुदायमा दीर्घकालीन प्रभाव छाड्न सफल भएको दाबी गरे ।
मध्यविन्दु अस्पतालको प्रसूति कक्ष स्तरोन्नति, थासी कम्युनिटी सामुदायिक अस्पतालमार्फत मधुमेह रोकथाम कार्यक्रम तथा उपकरण सहयोग तथा जनचेतनाका गतिविधिहरुले स्वास्थ्य सुरक्षामा पनि योगदान पु¥याएको उनले बताए । भरतपुर अस्पतालमा मिर्गौला रोगपीडितका लागि डायलासिस मेसिन हस्तान्तरण गर्नुका साथै नागरिकलाई निःशुल्क उपचार र औषधि वितरण गर्न सफल भएको उनले बताए ।
लायन्स अन्तर्राष्ट्रियको सहयोगमा म्याचिङ हङ्गर ग्रान्टअन्तर्गत राप्ती नगरपालिकाको ब्रह्मनगरमा ‘स्मार्ट क्यान्टिन’ निर्माण कार्य अघि बढाइएको उनले बताए । थासी कम्युनिटी सामुदायिक अस्पताल, ललितपुरमा मधुमेह सचेतना कार्यक्रम तथा उपकरण खरिदका लागि अनुदान स्वीकृत भई कार्यान्वयन प्रक्रियामा रहेको उनले बताए ।
स्टान्डर्ड म्याचिङ ग्रान्टअन्तर्गत विद्यालय भवन निर्माण तथा अस्पतालमा डायलासिस मेसिन खरिद प्रक्रिया अघि बढिसकेको उनले बताए । जेनजी आन्दोलनका कारण ध्वस्त भएको जिल्ला प्रशासन कार्यालय चितवनलाई तत्काल १५ थान कम्प्युटर, पाँच थान प्रिन्टर तथा स्क्यानर हस्तान्तरण गरी सङ्कट व्यवस्थापनमा पनि भूमिका निर्वाह गर्न पाएको क्लबले जनाएको छ ।






