मंसिर २९, गैँडाकोट –
गैँडाकोटस्थित प्रसिद्ध धार्मिक स्थल मौलाकालिका मन्दिरमा दानपेटिकाबाट रकम चोरी तथा सीसी क्यामेराको हार्डडिस्क लुटपाटमा संलग्न भएको आरोपमा प्रहरीले तीन जना युवक र मन्दिरकै एक कर्मचारीलाई पक्राउ गरेको छ।
मंसिर २६ गते भएको उक्त घटनामा संलग्न भएको आशंकामा मन्दिरका सहायक व्यवस्थापक छवि खनाललाई नियन्त्रणमा लिएर अनुसन्धान अघि बढाइएको जिल्ला प्रहरीले जनाएको छ। यसअघि पक्राउ परेका युवकहरूले प्रारम्भिक बयानमा चोरी तथा लुटपाट मन्दिरकै कर्मचारी खनालको सहयोगमा गरिएको स्वीकार गरेपछि उनलाई पक्राउ गरिएको हो।
पक्राउ पर्नेहरूमा गैँडाकोट–४ झपर्दिका सुदिप महतो, अनिल श्रेष्ठ र राजु घिमिरे रहेका छन्। प्रहरीका अनुसार मन्दिरको दराजमा राखिएको करिब दुई तोला बराबरको सुनको सिक्री केही दिनअघि हराएको विषय सार्वजनिक भएको भोलिपल्टै दानपेटिकाको रकम चोरी हुनुका साथै सीसी क्यामेराको हार्डडिस्कसमेत गायब बनाइएको थियो।
प्रहरीले घटनामा प्रमाण नष्ट गर्ने उद्देश्यले योजनाबद्ध रूपमा चोरी गराइएको हुन सक्ने आशंका गरेको छ। प्रारम्भिक अनुसन्धानबाट मन्दिरका कर्मचारीको मिलेमतोमा घटना घटाइएको देखिएको प्रहरीले जनाएको छ।
आस्थाको केन्द्र मानिने मौलाकालिका मन्दिरमै कर्मचारीको संलग्नतामा चोरी भएको घटनाले भक्तजन तथा स्थानीयवासीलाई स्तब्ध बनाएको छ। घटनाबारे थप अनुसन्धान जारी रहेको प्रहरीले जानकारी दिएको छ।
