काठमाडाैं कात्तिक १९
नेकपा (माओवादी केन्द्र) र नेकपा (एकीकृत समाजवादी)सहित नौ दलबीच आज एकता हुँदै छ । एकताका लागि यसअघि सहमति पत्रमा हस्ताक्षर गरेका पार्टीबीच काठमाडौंको भृकुटीमण्डपमा आज एकता घोषणा हुन लागेको हो ।
माओवादी केन्द्रका नेता अग्नि सापकोटाका अनुसार एकीकृत पार्टीको नाम नेपाली कम्युनिष्ट पार्टी रहनेछ । चुनाव चिह्न पाँचकुने तारा रहने पहिले नै आठ दलबीच सहमति भइसकेको छ । आइतबार माओवादी, नेकपा एकीकृत समाजवादीलगायत आठ दलबीच भएको १८ बुँदे सहमति भएको थियो ।
आइतबार नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी, नेकपा (समाजवादी), जनसमाजवादी पार्टी, नेपाल, नेपाल कम्युनिस्ट पाटी नेकपा (माओवादी–समाजवादी) र नेकपा (साम्यवादी)बीच पार्टी एकता र कम्युनिस्ट एकीकरणको प्रकृया अगाडि बढाउन हस्ताक्षर गरिएको थियो । पछि यसमै गोला किराती नेतृत्वको पार्टी पनि जोडिएको थियो ।
नवगठित पार्टीको मार्गनिर्देशक सिद्धान्त मार्क्सवाद–लेनिनवाद रहनेछ भने नेपाली विशेषताको वैज्ञानिक समाजवादलाई कार्यदिशा मानिने सापकोटाले जानकारी दिए ।
पार्टीले जनवादी उपलब्धिहरूको रक्षा गर्दै समाजवादको आधार तयार गर्ने निर्णय पनि भएको उनले बताए ।
आन्दोलनको स्वरूपबारे सापकोटाले भने, ‘हाम्रो आन्दोलन मूलतः शान्तिपूर्ण हुनेछ। तर, परिस्थितिअनुसार सदन, सरकार र सडकसहित सबै मोर्चामा संघर्ष सञ्चालन गर्न सकिनेछ।’
नयाँ पार्टीको राष्ट्रिय महाधिवेशन ६ महिनाभित्र सम्पन्न गर्ने निर्णय भएको उनले बताए ।
एकता प्रक्रियामा सहभागी दलका साविक केन्द्रीय समिति सदस्यहरूलाई आपसी सहमतिका आधारमा समायोजन गरी नयाँ केन्द्रीय समिति बनाइने सापकोटाले जानकारी दिए ।
संरचनात्मक रूपमा पार्टीका सबै तहमा संयोजक र सहसंयोजक पद मात्र रहने उनले बताए ।
पार्टीको संरचनाअन्तर्गत केन्द्रीय समिति, राजनीतिक समिति, सचिवालय र कार्यसञ्चालन समिति रहने निर्णय भएको सापकोटाले बताए ।
