१ असोज, हेटौंडा ।
बागमती प्रदेश सरकारको नेतृत्व गरिरहेको नेपाली कांग्रेस प्रदेश संसदीय दलले प्रदेशसभा सञ्चालनमा समयानुकूल निर्णय गर्ने भएको छ ।
प्रदेशसभा सञ्चालन सम्बन्धी संसद्मा प्रतिनिधित्व गर्ने अन्य दलसँग संवाद गर्ने र समायनुकूल निर्णय गर्ने दलको बैठकले निर्णय गरेको हो । बागमतीका मुख्यमन्त्रीसमेत रहेका दल नेता इन्द्रबहादुर बानियाँको अध्यक्षतामा मंगलबार भएको भर्चुअल बैठकमा जेनजीहरूको आन्दोलनपछि विकसित घटनाक्रमको समीक्षा र प्रदेश सरकार सञ्चालनको सम्बन्धमा छलफल भएको संसदीय दलका प्रवक्ता सुरजचन्द्र लामिछानेले जानकारी दिए ।
दल बैठकले प्रदेशसभा संसदीय समितिलाई थप क्रियाशील बनाउने निर्णय पनि गरेको छ । यद्यपि, हेटौंडा उपमहानगरपालिका–१०, स्थित प्रदेशसभा सचिवालयको नयाँ र पुरानो दुवै भवन २४ भदौमा भएको तोडफोड र आगजनीबाट ध्वस्त भएको छ ।
यसैगरी, जेनजीहरूको प्रदर्शनको क्रममा संघीय व्यवस्थापिका, प्रदेश सभा, संघीय तथा प्रदेश कार्यपालिका तथा न्यायलयहरु, स्थानीय तहका भौतिक संरचना, राजनितिक दलका विभिन्न तहका कार्यालय, राजनितिक नेतृत्व, सञ्चार गृह तथा उद्योगी, सुरक्षा निकाय र निजी आवास, सवारीसाधन, व्यापरिक केन्द्रमा भएको आगजनी र तोडफोडको घोर भर्त्सना गर्ने निर्णय गरेका प्रवक्ता लामिछानेले बताए ।
नेपाली कांग्रेसका सभापति तथा पूर्वप्रधानमन्त्री शेरबहादुर देउवा र बहालवाला पराष्ट्रमन्त्री डा. आरजु देउवा राणामाथि भएको भौतिक आक्रमणको भत्सर्ना गर्दै घटनाको सत्यतथ्य छानबिन गरेर दोषीमाथि कडा कारबाहीको माग बैठकले गरेको छ । दलको बैठकले संविधान, राष्ट्रियता र लोकतन्त्रको मूल मर्मअनुसार मुलुकलाई निकास दिएकोले राष्ट्रपति रामचन्द्र पौडेलप्रति उच्च सम्मान र कृतज्ञता व्यक्त गरेको प्रवक्ता लामिछानेले बताए ।
३ असोजमा संविधान दिवसलाई संविधानको सम्बर्द्धन र महत्त्व दर्साउनेगरी संयमित ढंगले मनाउनुपर्नेमा सरकारलाई सुझाव दिइएको उनले बताए । समाजमा शान्ति, सुरक्षा र सदभाव कायम राख्न कांर्ग्रेसका प्रदेशसभा सदस्यहरुले नेतृत्वदायी भुमिका खेल्दैसामाजिक अभियान्ताहरुसँग सहकार्य गर्ने निर्णय गरेको छ ।
दलले सुशासनको माग राख्दै जेनजी युवाद्वारा आयोजित प्रदर्शनको क्रम भएको मानवीय क्षतिले स्तब्ध बनाएको बताउँदै दलले ज्यान गुमाउनेप्रति श्रद्धाञ्जली अर्पण गर्ने निर्णय गरेको छ । यस्तै, काठमाडौंमा रहेका मुख्यमन्त्री बानियाँ आज हेटौंडा आउने तयारी गरेको उनको सचिवालयले जानकारी दिएको छ ।
