काठमाडाैं | भदौ १९,
नेपालमा सूचीकरण हुन नआएपछि अन्तत: फेसबुक, युट्युब लगायतका सामाजिक सञ्जाल प्लेटफर्महरू बन्द (निष्क्रिय) हुने भएका छन् ।
बिहीबार सञ्चार तथा सूचना प्रविधि मन्त्रालयमा बसेको बैठकले बिहीबारदेखि नै लागू हुनेगरि फेसबुक, युट्युब, इन्स्टाग्राम, व्हाटसप लगायत २६ सामाजिक सञ्जाल प्लेटफर्मलाई निष्क्रिय पार्न नेपाल दूरसञ्चार प्राधिकरणलाई निर्देशन दिने निर्णय गरेको हो ।
बैठकपछि प्राधिकरणका अधिकारी सञ्चार मन्त्रालयको पत्र लिएर प्राधिकरणको कार्यालय जमल पुग्दैछन् ।
प्राधिकरणका प्रवक्ता मिन प्रसाद अर्यालका अनुसार शुरूमा सञ्चार मन्त्रालयको पत्र अध्ययन गरिनेछ । उक्त पत्रका आधारमा सेवाप्रदायक निकायलाई पत्राचार गरिनेछ र प्राधिकरणका तर्फबाट सूचना समेत जारी गरिनेछ ।
प्राधिकरणका अनुसार नेपालमा १०७ आईपीएस र दुई भ्वाइस अपरेटर सेवा प्रदायक छन् ।
प्राधिकरणको पत्रपछि सेवाप्रदायक कम्पनीले सामाजिक सञ्जाल निष्क्रिय पार्ने काम अघि बढाउनेछन् । जस अनुसार सबै सामाजिक सञ्जाल एकैपटक बन्द हुने नभइ विस्तारै (लोडिङ, कनेक्टिङको अप्सन) नचल्ने हुँदै जानेछन् । र, क्रम आज बिहीबारदेखि नै शुरू हुने प्राधिकरणले बताएको छ ।
यसअघि सरकारले फेसबुक, युट्युब लगायतका सामाजिक सञ्जाललाई नेपालमा सूचीकृत हुन अन्तिम पटकका लागि सात दिनको समय दिएको थियो । मन्त्रिपरिषद् बैठकबाटै निर्णय गरेर दिइएको उक्त समयावधि बुधबार गुज्रिएको छ ।
तर, निर्धारित समयमा कुनै पनि सामाजिक सञ्जाल प्लेटफर्मले सूचीकरणका लागि निवेदन नदिएपछि सरकारले निष्क्रिय पार्न लागेको हो ।
सञ्चार तथा सूचना प्रविधि मन्त्री पृथ्वी सुब्बा गुरुङले सर्वोच्च अदालतको परमादेश र मन्त्रिपरिषद्को निर्णयका आधारमा नेपालमा दर्ता नभएका सामाजिक सञ्जाल बन्द गर्ने निर्णय भएको बताएका छन् ।
‘सर्वोच्चको परमादेश, मन्त्रिपरिषद्को निर्णय र दर्ता गर्नका लागि पटक–पटक गरिएको आग्रह अस्वीकार गरेपछि बन्द गर्ने निर्णयमा पुग्यौं,’ मन्त्री गुरुङले भने ।
जस अनुसार फेसबुक, एक्स र युट्युबलगायत झण्डै २ दर्जन सामाजिक सञ्जाल बन्द हुनेछन् ।
दर्ता भएका टिकटक र भाइबर भने बन्द हुने छैनन् । २ वर्षअघि सरकारले केही समयका लागि टिकटक बन्द गरेको थियो ।
