चितवन, भदौ १७-
भरतपुरस्थित नमूना पेट्रोल स्टेसन शुभ पेट्रोल्याण्ड प्रा.लि ले सम्पूर्ण सुरक्षा व्यवस्थापनलाई थप सुदृढ बनाउन डेल्टा फोर सेक्युरिटी एण्ड ट्रेनिङ सर्भिस प्रा. लि.सँग सहकार्य गरेको छ ।
सहकार्यमा पेट्रोल स्टेसन परिसरमा प्रतिदिन १८ घण्टा सुरक्षा सेवा उपलब्ध गराउने व्यवस्था समेत गरेको हो ।
यस सम्झौतापछि शुभ पेट्रोल्याण्डमा आउने सम्पूर्ण ग्राहक र साझेदारहरूले अझ सुरक्षित र सहज वातावरणमा सेवा लिन सक्ने कम्पनीका प्रबन्ध निर्देशक सबल पियाले बताए । उनले भने, “हामीले ग्राहकहरूको सुरक्षा र सुविधा उच्च प्राथमिकतामा राखेका छौँ। व्यावसायिक सुरक्षा कम्पनीसँगको सहकार्यले हाम्रो सेवामा थप विश्वासिलो र पेशागत स्तर ल्याउनेछ।”
त्यस्तै डेल्टा फोर सेक्युरिटी एण्ड ट्रेनिङ सर्भिस प्रा.लि का सञ्चालकले भने, “शुभ पेट्रोल्याण्ड जस्तो अग्रणी इन्धन स्टेसनसँगै सहकार्य गर्नु हाम्रो लागि गौरवको कुरा हो। हामीले यहाँ अनुभवी, तालिमप्राप्त सुरक्षा गार्डहरू तैनाथ गर्दै उच्चस्तरीय सुरक्षा सुनिश्चित गर्नेछौँ। हाम्रो उद्देश्य केवल सुरक्षा दिनु मात्र नभई, ग्राहकलाई विश्वासिलो र सहज अनुभव दिलाउनु हो।”
शुभ पेट्रोल्याण्ड प्रा.लि. विगतदेखि नै आर्थिक रूपमा कमजोर विद्यार्थीहरूलाई निःशुल्क पढाउने र छात्रवृत्ति प्रदान गर्ने कार्यक्रम, स्थानीय फुटबल क्लब, खेलकुद प्रतियोगिता र अन्य सामुदायिक गतिविधिहरूमा निरन्तर सहयोग, निःशुल्क स्वास्थ्य जाँच शिविर र चालक–सहचालकलाई नियमित सहयोग जस्ता सामाजिक कार्यहरू गर्दै आएको छ।
डेल्टा फोर सेक्युरिटी एण्ड ट्रेनिङ सर्भिस प्रा.लि ले विगतदेखि नै विभिन्न बैंक, उद्योग र व्यावसायिक प्रतिष्ठानहरूमा सुरक्षा सेवा प्रदान गर्दै आएको छ। अब शुभ पेट्रोल्याण्ड मा पनि उनीहरूको अनुभव र व्यावसायिकता लागू हुने भएकाले सम्पूर्ण ग्राहक, सार्वजनिक सवारी चालक र कर्मचारीहरूलाई थप सुरक्षित वातावरण मिल्ने विश्वास गरेको छ ।
शुभ पेट्रोल्याण्डमा उच्च गुणस्तरको इन्धन वितरणसँगै निःशुल्क टायरमा हावा भर्ने सुविधा, सवारी सफा गर्ने सेवा, आधुनिक सिसिटिभी निगरानी प्रणाली, फ्री वाईफाई र ग्राहक–मैत्री वातावरण उपलब्ध छन्। हालै सुरु गरिएको सुरक्षा सेवाले यसलाई अझ मापदण्डयुक्त र सुरक्षित इन्धन स्टेसनको रूपमा स्थापित गर्ने अपेक्षा गरिएको छ।
