काठमाडौँ, भदौ २ –
सरकारको नेतृत्व गरिरहेको दल नेकपा (एमाले) का महासचिव शंकर पोखरेलले आगामी फागुनपछि मात्र संविधान संशोधन प्रक्रिया अगाडि बढाउने बताएका छन् । कैलालीको धनगढीमा सोमबार प्रेस चौतारीले आयोजना गरेको पत्रकार सम्मेलनमा बोल्दै राष्ट्रिय सभा निर्वाचनअघि संविधान संशोधन नहुने बताएका हुन् ।
संविधान संशोधनकै लागि कांग्रेस र एमाले सरकारमा गएको भन्दै पोखरेलले दुई कारणले संशोधन अहिले सम्भव नभएको जिकिर गरे ।
‘एकातिर सरकारले अगाडि सारेको मुद्दामा छलफल गर्न सरकारमा रहेका दलहरू त्यति धेरै सकारात्मक भइसकेका छैनन् । वातावरण बनाउनुपर्यो । वातावरण नबनीकन संविधान संशोधन गर्ने मुद्दामा एकैचोटी प्रवेश गर्नु उचित हुँदैन । अर्कोतिर राष्ट्रियसभामा सरकारमा रहेका प्रमुख दलहरूको बहुमत समेत सुनिश्चित छैन । ५/६ महिनामा १९ सिट खाली हुन्छ । त्यसपछि दुवै दल मिलेर सफलता प्राप्त गर्न सकिन्छ । अनुकूलता निर्माण गर्छौँ । त्यसपछि हामी संविधान संशोधनको विषयमा व्यवस्थित ढङ्गले प्रवेश गर्छौँ ।’
उनले संविधान संशोधनपश्चात् अस्थिरताको जे चुनौती छ, त्यो हटाउने बताएका छन् ।
