‘उनीहरूलाई संगठन बुझ्न पनि समय लाग्छ । पार्टीले महाधिवेशन गर्न बनाएका निर्देशन समितिले भरपर्दो कार्यतालिका ल्याउन भनेर अन्तिम पटकका लागि थपौँ,’ देउवाले पार्टी नेताहरूसँगको बैठकमा भन्दै आएका छन् । देउवाले जेठ १९ गतेको पदाधिकारी बैठकमा पनि त्यही धारणा राखेका थिए । त्यसपछि पनि नेतारूसँग त्यही धारणा राख्दै आएका छन् ।

तर महामन्त्री थापाको धारणा देउवाको भन्दा ठिकविपरीत छ । अहिलेकाले महाधिवेशन गराउन नसक्ने दाबी गर्दै उनले नयाँ तदर्थ समिति बनाउनुपर्ने बताउँदै आएका छन् ।

‘उनीहरूको म्याद थप्नु भनेको समय खेर फाल्नु मात्रै हो,’ महामन्त्री थापाको धारणा छ । सभापति देउवासँग फरक मत राखेका महामन्त्री थापाले रातोपाटीसँग भने, ‘अहिलेसम्म गर्न नसक्नेले अब समय थप्दा गर्न सक्दैन तसर्थ खारेज गरेर नयाँ बनाऊँ भन्दै आएको छु । सभापतिज्यूले एक पटकका लागि अन्तिम पटक पार्टीले बनाएको निर्देशन समितिसँग कार्यतालिका मागेर समय थपौँ भनिरहनु भएको छ ।’

सभापति र महामन्त्रीबिच नै कुरा नमिलेपछि पार्टीले बनाएको निर्देशन समिति र तदर्थ समितिलाई एकै ठाँउमा राखेर महाधिवेशन गर्ने कार्यतालिका माग्दै कांग्रेसले छलफल गरिरहेको छ । महामन्त्रीद्वय थापा र विश्वप्रकाश शर्माले निर्देशन समिति र तदर्थ समितिका पदाधिकारीलाई एकै ठाँउमा राखेर छलफल गरिरहेका छन् ।

दुई महामन्त्रीले जेठ ३० गते नेपाल दलित संघको निर्देशन समिति र तदर्थ समितिसँग छलफल गरेका थिए । महामन्त्री थापाले दलित संघको तदर्थ समिति र निर्देशन समितिबिच विवाद रहेको र उनीहरू आफै बसेर मिलाएर कात्तिकसम्म महाधिवेशन गर्ने प्रतिबद्धता जनाएको जानकारी दिए ।

संघमा निर्देशन समितिको संयोजकमा कांग्रेस सहमहामन्त्री जीवन परियार र तदर्थ समितिको संयोजकमा लोकबहादुर विश्वकर्मा छन् । पार्टीभित्र परियार डा. शेखर कोइरालाले नेतृत्व गरेको इतर समूहमा र विश्वकर्मा संस्थापन पक्षमा भएकाले विवाद रहँदै आएको छ ।

थापाका अनुसार आफूहरूबिच रहेको विवाद आफै बसेर मिलाउने प्रतिबद्धता निर्देशक समिति र तदर्थ समितिका पदाधिकारीले जनाएका छन् । महामन्त्री थापाले आज (असार २ गते) नेपाल विद्यार्थी संघ, असार ३ गते तरुण दल र ५ गते महिला संघको निर्देशन समिति र तदर्थ समितिका पदाधिकारीसँग छलफल गर्ने तय भएको जानकारी दिए ।महिला संघका केन्द्रीय सदस्यहरूले सामूहिक राजीनामा दिएका छन् भने नेविसंघमा अध्यक्ष दुजाङ शेर्पाले जिल्ला र क्याम्पसहरूमा केन्द्रीय प्रतिनिधि खटाएपछि इतर समूहको नेतृत्व गर्ने प्रेमिका राना मगरले समानान्तर रूपमा प्रतिनिधि खटाएपछि विवाद चरमोत्कर्षमा छ ।

तरुण दलमा लमजुङको जिल्ला अधिवेशनमा खुकुरी हानाहान भएपछि विवाद चरमोत्कर्षमा छ । असार १० गतेसम्म महाधिवेशन गर्न नसकेका भ्रातृसंस्थाका निर्देशन समिति र तदर्थ समितिका पदाधिकारीलाई एकै ठाउँमा राखेर छलफल गर्ने छलफलमा चित्तबुझ्दो जवाफ आएमा थप्ने, चित्तबुझ्दो जवाफ नआए खारेज गर्ने तयारी छ ।

कांग्रेसले भ्रातृसंस्थाको म्याद थप्ने वा खारेज गर्ने तथा अन्य समसामयिक राजनीतिबारे छलफल गर्न असार १५ गर्ते केन्द्रीय कार्यसमिति बैठक बोलाएको छ ।