चितवन, फागुन ११
विप्लव नेतृत्वको नेपाल कम्युनिस्ट पार्टी (नेकपा) का विद्यार्थी नेता सुमन श्रेष्ठ जनता समाजवादी पार्टी (जसपा) नेपालमा प्रवेश गरेका छन्। ‘जनतासँग जसपा’ अभियानअन्तर्गत आज भरतपुरमा आयोजित एक कार्यक्रममार्फत श्रेष्ठले पार्टी प्रवेश गरेका हुन्।
सप्तगण्डकी कलेजबाट विद्यार्थी राजनीतिमा सक्रिय भएका श्रेष्ठ अखिल (क्रान्तिकारी) को कलेज अध्यक्ष हुँदै जिल्ला अध्यक्षसमेत भएका थिए। जसपा नेपालका चितवन जिल्ला संयोजक अनुज जोशीका अनुसार श्रेष्ठलाई पार्टीले जिल्लामा विद्यार्थी नेतृत्वको जिम्मेवारी दिने निर्णय गरेको छ।
पार्टी प्रवेश कार्यक्रममा श्रेष्ठले समाजवादी विद्यार्थी युनियन चितवनको विद्यार्थी आन्दोलनमा अग्रणी भूमिका रहेको बताए। साथै, उनले आउँदै गरेको स्वतन्त्र विद्यार्थी युनियन (स्ववियु) निर्वाचनलाई लक्षित गरी कार्यक्रम ल्याउने बताएका छन्।
उक्त कार्यक्रममा जसपा नेपालका चितवन जिल्ला संयोजक जोशी, महानगर उपाध्यक्ष राजु टमाटा, विद्यार्थी विभागका जिल्ला अध्यक्ष अनुरोध चौधरी, युवा भोलिन्टियर फोर्सका अध्यक्ष दिलीप मल्ललगायत नेताहरूको उपस्थिति रहेको थियो।
