चितवन, पुष ११ –
कृषि तथा वन विज्ञान विश्वविद्यालय रामपुर चितवनका केन्द्रीय र आंगिक क्याम्पसका प्राध्यापकहरुलाई तालिम दिन सुरु गरिएको छ ।
विश्वविद्यालयको निरन्तर शिक्षा केन्द्रका निर्देशक प्रा. डा. निराजन भट्टराईले शिक्षा केन्द्रले विश्वविद्यालयमा कार्यरत शिक्षक तथा कर्मचारीहरुको क्षमता विकास गर्दै आएको र क्षमता विकास गर्ने क्रममै ५ दिने तालिम सञ्चालन गरिएको बताउनु भयो ।
बिहानको चरणमा विश्वविद्यालयमा हालसालै नियुक्ति लिएकाहरुलाई बैज्ञानिक लेखन(साइन्टिफिक राइटिङ्) को तालिम दिइएको छ ।
प्राध्यापकहरुले गरेका वैज्ञानिक अनुसन्धान तथा खोजमुलक कामहरुलाई कसरी संसारले पढन् सक्ने, संसारमा पुर्याउने र वैज्ञानिक तवरले लेख्ने पढ्ने बनाउन सक्ने भन्ने उद्देश्य बिहानको तालीमको रहेको छ ।
त्यसैगरी दिउसो (दोश्रो) चरणमा अनुसन्धानबाट लिएका तथ्यांकहरुको विश्लेषण कसरी गर्ने, त्यसबाट प्राप्त नतिजाहरुलाई कसरी प्रसार गर्नका लागि किसानले बुझ्ने भाषामा वा विश्व बजारमा विश्वका वैज्ञानिकहरुले बुझ्ने भाषामा वा नीति निर्माताहरुले बुझ्ने भाषामा कसरी त्यसको विश्लेषण गरेर ल्याउन सकिन्छ भन्ने विषयमा तालिम दिन लागिएको डा.भट्टराईले बताउनु भयो ।
तालिमको बिहानको चरणमा २० जना र दोश्रो चरणमा ३० जनाको सहभागिता रहेको छ । युएसएआईडी नेपालको वित्तिय सहयोग, अमेरिकाको टस्केजी बिश्वबिद्धालयको नेतृत्व, भारतको सदगुरुसँगको सहकार्य र कृषि विश्वविद्यालयको निरन्तर शिक्षा केन्द्रको संयोजनमा तालिम सुरु गरिएको हो ।
टस्केजी युनिभर्सिटी अमेरिकाका प्राध्यापक एवम् परियोजनाका टिम लिडर प्रा. डा. नरकाजी गुरुङ्गले तालिम प्राध्यापकहरुका लागि एकदमै महत्वपूर्ण तालिम भएको बताउनुभयो । तालिममा क्यालिफोर्निया स्टेट युनिभर्सिटीका प्रा.डा.अनिल श्रेष्ठ प्रशिक्षण गरिरहनुभएको छ ।
