– हिरालाल आचार्य ‘डायमण्ड’
चितवन, मंसिर २९ –
कृषि तथा वन विज्ञान विश्वविद्यालय रामपुर चितवनमा दोस्रो संस्करणको ‘कृषि प्रदर्शनी तथा कृषक मेला– २०८१’ सुरु भएको छ ।
कृषि तथा वन विज्ञान विश्वविद्यालयको कृषि संकाय परिसरमा आजबाट मेला सुरु भएको हो । मेलाको बागमती प्रदेशका वन तथा वातावरण मन्त्री कृष्ण प्रसाद सिलवालले उद्घाटन गर्नुभयो । आजबाट आगामी पुस ३ गते अर्थात ५ दिनसम्म मेला चल्ने छ ।
उद्घाटन कार्यक्रममा बोल्दै मन्त्री सिलवालले रैथाने बाली संरक्षणमा जोड दिन यो प्रदर्शन सफल बनोस् भनि शुभकामना दिनुभयो । बागमती प्रदेश माछा, ब्रोइलर कुखुरा र दुधमा करिब आत्मनिर्भरको अवस्थामा पुगेको बताउँदै मन्त्री सिलवालले अब अन्नबालीमा आत्मनिर्भर बनाउन मन्त्रालयको ध्यान रहेको बताउनु भयो । उहाँले कृषि मेलाको अवलोकन गरी यसको लाभ लिन चितवनसहित यस आसपासका किसानहरुलाई आह्वान गर्नु भएको छ ।
मेला आयोजक सचिवालय संयोजक एवं विश्वविद्यालयका अनुसन्धान तथा प्रसार निर्देशनालयका निर्देशक प्रा.डा. ऋषिराम कट्टेलले किसानको ज्ञान, सीप र दक्षता अभिवृद्धि गर्ने उद्देश्यले मेला आयोजना गरिएको बताउनुभयो ।
उहाँका अनुसार कृषि प्रदर्शनी तथा कृषक मेलामा कृषि, पशु व्यवसाय तथा भेटेरीनरी र वन क्षेत्रका गरी ९६ स्टल (कक्ष) रहेका छन् । साथै १० हजार भन्दा बढी सहभागीहरु र २०० भन्दा बढी प्रदर्शकहरुको सहभागिता रहने अपेक्षा गरिएको छ । किसान, शिक्षाप्रेमी, बुद्धिजीवी, विद्यार्थी, उद्यमी व्यवसायी र सरोकारवाला सबैको सहभागिता हुने अपेक्षा आयोजकको छ ।
मेलामा कृषि प्रविधि, नवप्रवर्तन तथा अनुसन्धानका विषयमा समेत छलफल हुनेछ । मेलामा किसानलाई आवश्यक पर्ने नयाँ प्रविधिको प्रदर्शनी गरिनुका साथै किसानले अवलम्बन गरेका प्रविधि, सीप तथा ज्ञानको विषयमा समेत छलफल हुने उहाँले बताउनु भयो ।
मेलामा कृषि क्षेत्रको नीतिगत बहस, कृषि रुपान्तरणका विषयमा कृषि उद्यमी तथा सरोकारवालासँग छलफल, दिगो पशुपालन भेटेरीनरी सेवा तथा मानव–वन्यजन्तु द्वन्द्व व्यवस्थापन लगायतका विषयमा पनि समूहगत छलफल हुनेछ ।
यसैगरि मेला अवधिभर विभिन्न मनोरञ्जनात्मक कार्यक्रमहरु, सांस्कृतिक प्रतियोगिताका साथै कृषि, पशुपन्छी तथा वनका क्षेत्रमा उद्यम, व्यवसाय, नवप्रवर्तन र अनुसन्धान मार्फत योगदान पुर्याएका विश्वविद्यालयका पूर्व विद्यार्थीहरुलाई सम्मान गर्ने कार्यक्रम पनि रहेको संयोजक कट्टेलले जानकारी दिनुभयो ।
किसान, विद्यार्थी र अनुसन्धानकर्ताबीच छलफल तथा कृषि क्षेत्रमा देखिएका समस्याको समाधानका लागि मेला कोशेढुङ्गा बन्ने कृषि कृषि तथा वन विज्ञान विश्वविद्यालयका रजिष्ट्रार प्रा.डा. शारदा थपलियाले बताउनुभयो ।
पहिलो संस्करणको मेला वि.सं. २०७६ सालमा भएको थियो । ५ वर्षपछि हुन लागेको मेलालाई अब नियमित कम्तिममा हरेक दुईदुई वर्षमा गरिने प्रा.डा. थपलियाको भनाइ छ । उहाँले मंसिर ३ गते नै आगामी मेला हुने दिनको मिति तय गरिने बताउनु भयो । कोरोनाका कारण ५ वर्षपछि मेला गर्नुपरेको उहाँको भनाइ थियो ।
उद्घाटन कार्यक्रममा राष्ट्रिय सहकारी बोर्डका सह अध्यक्ष मित्रराज दवाडी, राष्ट्रिय किसान आयोगका सदस्य टेक बहादुर बोगटी, मकै बाली अनुसन्धान कार्यक्रमका संयोजक डा. राजेन्द्र दराई, कृषि संकायका डिन प्रा.डा. अर्जुन कुमार श्रेष्ठ, जिल्ला समन्वय समिति चितवनका प्रमुख नारायण अधिकारी, उद्योग वाणिज्य संघ चितवनका पूर्व अध्यक्ष डा. तिलचन्द्र भट्टराई लगायतको उपस्थिति रहेको थियो ।
