काठमाडौँ, कात्तिक २८-
छाला हाम्रो शरीरको यस्तो एउटा अङ्ग हो जसले हामीलाई कयौँ बाह्य चीजहरूबाट सुरक्षा प्रदान गर्दछ । यसलाई धेरैले हाम्रो स्वास्थ्यको ऐना पनि भन्छन् । बिस्तारै उमेर बढ्दै जाँदा हाम्रो छाला सुख्खा हुने, चाउरी पर्ने अनि छाला झोलिने जस्ता बुढ्यौलीका लक्षणहरू देखा पर्न थाल्छन् । यसको एउटा कारण चाँहि उमेरसँगै शरीरमा कोलाजेन उत्पादनमा कमी आउनु पनि हो ।
निद्राको कमी, मदिरा सेवन, धूम्रपान र पराबैंगनी किरणको प्रभावले पनि छालाको कसिलोेपन कम गर्न सक्छ । तर, यस्ता केही घरेलु उपायहरू छन् जुन छालालाई कडा बनाउन प्रभावकारी साबित हुन सक्छन् । आजको यस लेखमा हामीहरू तपाईलाई बुढेसकालको असरलाई कम गर्न घरमै फेस प्याक बनाउने र प्रयोग गर्ने तरिका बताइरहेका छौं ।
घरमै यसरी बनाउनुहोस् एन्टी एजिङ फेस प्याक
मेवाको फेस प्याकः
मेवामा पापेन नाम गरेको विशेष इन्जाइम पाइन्छ । यसले छालाबाट विषाक्त पदार्थहरू हटाउन र रंग सुधार्न मद्दत गर्दछ । पापेन अल्फा–हाइड्रोक्सी एसिड संग मिलेपछि यसले निकै राम्रो एक्सफोलिएटको काम गर्छ । यसबाट छालामा चमक, नमी र कोमलता आउँछ ।
मेवामा लाइकोपीन जस्ता एन्टिअक्सिडेन्ट पनि प्रशस्त हुन्छ, जसले छालामा बुढ्यौलीको प्रक्रियालाई धेरै हदसम्म उल्टाउन मद्दत गर्छ । यसका लागि एक कप काटेको काँचो मेवा, १ चम्चा मह र १ चम्चा कागतीको रसको पेस्ट बनाएर अनुहारमा २० मिनेट लगाएर धुनुहोस् । यसको नियमित प्रयोगले छालामा निखार र चमक आउँछ ।
केराको फेस मास्कः
केरामा कयौँ प्रकारका भिटामिन पाइन्छ । केरा भिटामिन ए, भिटामिन बी६, पोटाशियम र भिटामिन सी जस्ता भिटामिनले भरपुर हुन्छ । यी सबैले छालासँग सम्बन्धित समस्याहरूलाई हटाउन सक्छ । केरामा एन्टिअक्सिडेन्ट हुन्छ । जसले मुक्त कणसँग लड्न मद्दत गर्न सक्छ र छालालाई क्षतिबाट बचाउँछ । केराको फेस प्याक लगाउँदा छालामा निखार आउँछ ।
यसले छालालाई मोस्चराइज गर्छ र यसलाई नरम बनाउँछ । फेसप्याक बनाउन पहिला १ चम्चा दही र एउटा सानो केरालाई कचौरामा हालेर मिच्नुहोस् । यो पेष्टलाई अनुहार र गर्धनमा लगाएर १५–२० मिनेटपछि घुनुहोस् । यो फेस मास्कले छालालाई ताजगी त दिन्छ नै चम्किलो र स्वस्थ पनि राख्छ ।
