चितवन, भदौ १० –
चितवनमा पहिलो पटक लन्ड टेनिस प्रतियोगिता सुरु भएको छ । प्रिमियर टेनिस एकेडमीको आयोजना र एसडी इभेन्ट म्यानेजमेन्टको सह आयोजनामा एकेडमीको ग्राउण्डमा प्रतियोगिता सुरु भएको हो ।
सिंगल पोल (एकएक जना खेल्ने) र डबल पोलमा (दुईदुई जना खेल्ने) खेल सुरु भएको हो । खेलमा १५ खेलाडी सहभागी रहेका एकेडमीका सञ्चालक एवम् टेनिस प्रशिक्षक कुमार जंग क्षेत्रीले जानकारी दिए । बिहान बेलुका गरेर प्रतियोगिता ४ दिनसम्म चल्ने छ । प्रतियोगिताको फाइनल खेल १४ गते हुने छ ।
खेलमा २५०० दर्ता शुल्क रहेको खेलमा प्रथम पुरस्कार ८ हजार र द्दित्तिय पुरस्कार ५ हजार रहेको छ ।
खेलमा सेन्ट्रल कलेजले मुख्य प्रायोजन गरेको छ । चितवनको खेल विकासमा महत्वपूर्ण सहयोग गर्दै आएका सेन्ट्रल कलेजका प्रिन्सिपल एवम् समाजसेवी यज्ञविलास पौडेल ‘वाइवी’ ले आफूले पहिलो पटक टेनिस प्रतियोगितामा सहयोग गर्न पाउँदा खुसी लागेको बताए । उनले अब चितनमा टेनिस खेलको विकासमा पनि आफूले सहयोग गर्दै जाने बताएका छन् ।
चितवनमा टेनिस विकासका लागि भन्दै कुमार जंग क्षेत्रीले प्रिमियम टेनिस एकेडमी खोलेका छन् । पारस बसपार्क (केन्द्रीय बस टर्मिनल) मिलन चोकमा गुरुकुल स्कुलको अगाडि उनले ग्राउण्ड बनाएर टेनिस सिकाइरहेका छन् । टेनिस प्रतियोगितामा उक्त एकेडमीमा सिकिरहेका खेलाडीहरुको सहभागिता रहेको छ ।
चितवनमा पहिलो पटक खुलेका लन्ड टेनिस एकेडमीले चितवनबाट टेनिसका राष्ट्रिय तथा अन्तर्राष्ट्रिय खेलाडी उत्पादन गर्ने लक्ष्य लिएको छ ।
