चितवन,जेठ १०
पेट्रोलियम पदार्थमा गरिएको अत्यधिक मूल्यवृद्धि र सरकारले लगाएको विभिन्न शीर्षकका करहरूको विरोधमा आज आइतबार चितवनमा फरक खालको प्रदर्शन गरिएको छ। जेनजी अभियन्ता मिराज ढुंगाना नेतृत्वको ‘गरी खान देऊ’ को चितवन शाखाले मोटरसाइकल नचढाई हातले दोहोर्याएर विरोध र्याली आयोजना गरेको हो ।
चितवनको चौबिसकोठीबाट सुरु भएको उक्त र्याली लायन्स चोकसम्म पुगेको थियो। र्यालीको नेतृत्व गरेका युवा बिशु लामा गुरुङले दैनिक उपभोग्य वस्तुदेखि खाद्यान्नसम्म सबै कुराको मूल्य आकासिएको बेला आर्थिक संकटको समयमा जनतामाथि थप करको भार थोपर्नु अन्यायपूर्ण भएको बताए । उनले सरकारलाई ध्यानाकर्षण गराउने उदेश्यले शान्तिपूर्ण विरोध प्रदर्शन गरिएको जानकारी दिए ।
अभियन्ता मिराज ढुंगानाले सरकारले पेट्रोलियम पदार्थमा भन्सार महसुल, प्रदूषण शुल्क, सडक मर्मत दस्तुर, पूर्वाधार विकास कर, मूल्य अभिवृद्धि कर र हरित कर गरी ६ प्रकारका करहरू लगाउँदै आएको बताए। हाल प्रतिलिटर पेट्रोलको मूल्य २१७ रुपैयाँ पुग्दा सरकारले झन्डै ६५ देखि ७० रुपैयाँ त कर मात्रै लिने गरेको उनको भनाई छ ।
आन्दोलनको उद्देश्य सरकारसँग घाटामा पेट्रोल माग्नु नभई, संकटको घडीमा लगाइएका अनावश्यक करहरू हटाउन दबाब दिनु रहेको ढुङ्गानाको भनाइ छ । र्यालीमा सय बढि युवाको सहभागिता रहेको थियो ।
